Легендарниот Светислав Кари Пешиќ ќе ја заврши својата тренерска кариера на крајот од оваа сезона.
Тренерот на Баерн Минхен даде обемно интервју за германскиот весник „Ди Цајт“, во кое го објави своето пензионирање на крајот од сезоната.
Еден од најдобрите во историјата на овој спорт моментално има 77 години и во еден дел од интервјуто истакна дека ова ќе биде последната сезона од неговата кариера.
„Како што пишувам во книгата: еднаш тренер, секогаш тренер. Секогаш ќе бидам активен во кошарката, ќе држам предавања и слично. Но, кон крајот на мојот живот повеќе не можам да бидам главен тренер. Знам дека луѓето нема да ми веруваат кога ќе кажам дека си заминувам. Но, по оваа сезона, навистина е доволно. Имам прекрасна куќа во Барселона, каде што живее дел од моето семејство. И сакам почесто да бидам во мојот Пирот. Сакам да го живеам животот од поинаква перспектива. Но, по оваа сезона, навистина е доволно“, рече Пешиќ.
Легендарниот тренер со СР Југославија го освои златниот медал на Светското првенство во 2002 година, во 1993 година го освои Европското првенство со Германија, како и во 2001 година со СР Југославија, додека во 2003 година ја освои Евролигата со Барселона.
Со Србија беше вицешампион на светот во 2023 година, а една година подоцна на Олимписките игри во Париз ја освои бронзата.