Тимот на МЗТ Скопје ја победи Цибона со 87:74 во последното коло на АБА лигата и ја заврши својата работа околу опстанокот. Сега доаѓа потешкиот дел, каде МЗТ Скопје зависи од резултатот на мечот меѓу Будуќност и Борац. На македонскиот првак му е потребна победа на фаворитот и домаќин Будуќност за да обезбеди опстанок во елитата од регионалното кошаркарско натпреварување.
Тренерот Драган Николиќ не го криеше своето задоволство од триумфот над Цибона и се надева на поволен развој на настаните за МЗТ Скопје Аеродром.
„Игравме против еден гигант, Цибона, кому му посакувам многу среќа во продолжение од сезоната. Се навикнав МЗТ Скопје да игра во ваква атмосфера, салата беше полна и покрај периодот на празниците. Јас би издвоил две работи, победата ја посветувам на мојот покоен татко кому ќе му беше роденден. Сакам да се заблагодарам и на моите соработници, кои го водеа тимот во Сплит до победа, кога јас бев болен и не можев да сум на клупата. Зависиме од средбата Будуќност – Борац, но ние сме МЗТ Скопје и не би сакал да коментирам за ситуацијата, само ќе чекаме“, изјави Николиќ.