Њујорк Никс се пласираа во финалето на Источната конференција за прв пат од 2000 година, откако ги декласираа Бостон Селтикс со 119:81 во шестиот натпревар од полуфиналната серија.
Во преполниот „Медисон Сквер Гарден“, со рекордно скапи билети, домашниот тим ги оправда очекувањата и го победи актуелниот шампион, кој беше без својата прва ѕвезда, Џејсон Тејтум, кој го пропушти натпреварот поради повреда на Ахиловата тетива.
Кај Никс, дури шест играчи имаа двоцифрен број поени, а четворица надминаа 20 поени.
О’Џеј Ануноби и Џејлен Брансон постигнаа по 23 поени, Мајкл Бриџис 22, а Карл-Ентони Таунс 21 поен и 12 скока.
Џош Харт имаше трипл-дабл од 10 поени, 11 скока и 11 асистенции, а Мајлс Мекбрајд исто така имаше двоцифрен број на поени 10.
Во Бостон, Џејлен Браун собра 20 поени, Причард имаше 11, Хорфорд 10, додека Дерик Вајт со осум и Џру Холидеј со четири поени беа далеку од потрбното ниво за еден ваков натпревар.
Никси ќе играат против Индијана Пејсерс во финалето на Источната конференција, а првиот натпревар ќе се игра во среда во „Медисон Сквер Гарден“.