Некогашниот прв светски тениски рекет, Русинот Марат Сафин е уверен дека српскиот тенисер, Новак Ѓоковиќ ќе го престигне Швајцарецот Роџер Федерер и ќе стане најдобар тенисер на сите времиња.
„Мислам дека Новак ќе го престигне Роџер, има доволно време за тоа. Тој има 32 години, ако биде здрав и ако продолжи вака, верувам дека ќе игра додека не наполни 40“ – смета Сафин.
Рускиот тенисер неколкупати беше кобен за Федерер, како во полуфиналето на Австралија Опен во 2005 година кога во петтиот сет славеше со 9-7. Сафин мораше да се повлече од светскиот тенис во 2009 година поради повреда.
„Федерер имаше среќа во кариерата, избегна големи повреди. Остатокот од нашата генерација имаше проблеми – Куертен и Налбандијан имаа мака со колковите, јас со коленото. Ја завршив кариерата на 29 години поради повреда“ – рече Русинот.
Ѓоковиќ моментно има 16 гренд слем титули, четири помалку во однос на Федерер и две помалку во однос на Надал.
По бројот на недели на врвот на АТП листата, Србинот моментно заостанува зад Швајцарецот 47 недели.