Заврши серијата без пораз на Ливерпул, и тоа кај тимот на Вотфорд.
„Црвените“ доживеаја убедлив пораз (3-0), првпат по 44 натпревари. Пропаѓа во вода бркањето на рекордот на Арсенал кој ја освои Премиерлигата без ниту еден сезонски пораз, во 49 меча во низа.
За последниве две недели, денешниов беше втор пораз за избраниците на Јирген Клоп по оние 1-0 од Атлетико во Мадрид.
Првото полувреме на „Викариџ Роуд“ заврши без постигнат погодок. Возбудувањата следуваа во вторите 45 минути.
Исмаил Сар со два гола за само 6 минути, во 54 и 60 минута го најави големиот триумф, а додека играчите на Ливерпул се обидуваа да се соземат од шокот, капитенот Дини погоди во 72 минута за високи 3-0. На третиот гол на Вотфорд му кумуваше голема грешка на Александер-Арнолд.
И покрај поразот Ливерпул е апсолутен лидер на табелата, со 22 бода повеќе од второпласираниот Манчестер Сити.