Новак Ѓоковиќ и Рафаел Надал викендов победија на турнирите во Дубаи, односно во Акапулко. Тие ги задржаа своите позиции на АТП листата на која од понеделникот се случи една голема промена, зад најдобрите двајца повеќе не е Роџер Федерер.
Ѓоковиќ на врвот има 10.220 поени, Надал на второто место има 9.850. Најголемата промена во топ 10 се случи на третото место.
Федерер, кој поради операцијата на коленото ќе паузира неколку месеци, не ги одбрани поени освоени минатата година кога победи во Дубаи, поради што му го препушти третото место на Доминик Тим.
Австриецот има 7.045 поени. За него ова е најдобриот пласман на АТП листата во кариерата.
Федерер е на четвртото место со 6.630 поени, а зад него е Данил Медведев од Русија (5.890).
Од шестото до десеттото место своите позиции ги задржаа Стефанос Циципас, Александар Зверев, Матео беретино, Гаел Монфис и Давид Гофан.