Макс Ферстапен ќе има двајца телохранители покрај себе за време на тркачкиот викенд во Мексико Сити. Ова го соопшти Хелмут Марко, советник во Ред Бул.
Причината за ваквата одлука е што не се очекува дека трикратниот светски шампион во Формула 1 ќе добие топло добредојде во мексиканската престолнина.
Холанѓанецот доаѓа на теренот на клупскиот колега Серхио Перез. Ферстапен беше жестоко исвиркан на подиумот во Остин, а во Мексико се очекува да биде уште полошо.
Макс минатата година ги налути навивачите кога одби да ја испочитува тимската наредба и да му ја отстапи позицијата на Перез, кој се бореше за второто место во генералниот пласман.
„Макс рече дека не му треба никој и дека е целосно опуштен. Сепак, ние мора да преземеме одговорност. Неговата безбедност е наш приоритет“, изјави Марко.