Поранешната светска тенисерка број 1 и шампионка од Австралија опен, Анџелике Кербер објави дека ќе го смени тренерот, германскиот сонародник Торбен Белц по падот во формата и во рејтингот во 2017 година.
29-годишната Кербер имаше фантастична 2016 во која победи на Австралија опен и САД опен, а играше и во финалето на Вимблдон, меѓутоа потоа следуваше драматичен пад во формата и во моментов таа е на 21. место на ВТА листата со само 28 победи во 51 меч оваа сезона. Нејзин нов тренер ќе биде Белгиецот Вим Фисет.
„Беше тешко, но сакам да почнам ново поглавје во мојата кариера, со нов тренер. Му благодарам на Торбен за сè што направи за мене, бидејќи не беше само мој тренер, туку и пријател и тоа нема да се смени“, напиша Кербер на Твитер.
37-годишниот Белгиец Фисет има доволно искуство како тренер, работејќи во кариерата со Ким Клајстерс, Симона Халеп, Викторија Азаренка и Џоана Конта.