Top Sport

Facebook Twitter

Кубацки победи во Бишофсхофен и ја освои „4 скокалници“ (видео)

Микс Makfax / 07.01.2020

Давид Кубацки го остави најдоброто за крај, откако триумфираше на скокалницата во австрискиот Бишофсхофен за да ја победи норвешката сензација Мариус Линдвик за титула од новогодишната турнеја „4 скокалници“ како трет Полјак по Адам Малиш (2003) и Камил Штох (2017 и 2018).

Кубацки беше лидер во пласманот на новогодишната серија и пред скоковите во Бишофсхофен, но без победа, откако на претходните три скокалници беше на подиумот и беше во директна битка со младиот Линдвик, кој пак победи во Гармиш-Партенкирхен и во Инсбрук, но лошиот пласман на првата скокалница во Оберстдорф беше клучен.

Дека Кубацки е подготвен за големи работи, тој покажа уште во првата серија, кога со огромен скок од 143 метри го обезбеди првото место, за во втората серија да скокне 140.5 метри за да собере вкупно 300.9 поени. Второто место го освои Германецот Карл Гајгер со 291 поен (140 и 136 метри), додека Линдвик успеа да биде само трет со 289.4 поени (139 и 137 метри).

Пласманот на топ 3 беше идентичен и во пласман на „4 скокалници“ – Кубацки е победник со 1.131,6 поени пред Линдвик (1.111) и Гајгер (1.108,4).

Scroll to Top