Од најдрастичните мерки до целосна релаксација. Крег Тајли, директорот на Австралија опен, истакна дека тенисерите не треба да се тестираат за коронавирус, а можат да играат дури и ако се заразени на првиот Грен слем сезонава.
Здравствената политика, за која Тајли рече дека го одразува она што се случува во пошироката заедница, е значајна промена од строгите протоколи што го одбележаа турнирот во последните две години.
Турнирот во 2021 година се одржа во таканаречен „балон“, а минатата година деветкратниот победник на турнирот Новак Ѓоковиќ беше депортиран бидејќи не бил вакциниран.
„Само сакавме да следиме што се случува во заедницата“, рече Тајли, додавајќи:
„Отидовме чекор понатаму со тоа што препорачавме да избегнувате игри кога сте болни, а нашиот медицински персонал ќе продолжи да го следи тоа. Јасно им кажавме на нашите играчи, како и на нашиот персонал, дека ако некој не се чувствува добро, нека остане дома, но знаеме дека потенцијално ќе има тенисери кои ќе играат и со Ковид“.