Top Sport

(Не)очекувано – Надал се повлече од Индијан Велс

Денес во Индијан Велс стартува првиот Мастерс оваа сезона. Од турнирот пред неговиот почеток се повлече Рафаел Надал.

Шпанскиот тенисер сфати дека се уште не е подготвен за толку тежок турнир како Индијан Велс и реши да се повлече.

„Со голема тага морам да се повлечам од овој фантастичен турнир“, напиша Надал на социјалните мрежи. „Сите знаат колку го сакам ова место и колку сакам да се натпреварувам овде во Индијан Велс. Затоа дојдов во пустината толку рано да тренирам и да се обидам да бидам подготвен. Тренирав напорно и сите знаете дека направив проба минатиот викенд, но не се чувствувам подготвен да играм на моето максимално ниво на ваков важен турнир“.

Надал во неделата учествуваше на егзибицијата во Лас Вегас каде по квалитетна игра беше поразен од Карлос Алкараз во супер тај-брејк кој се играше наместо третиот сет. Тој спаси дури пет сет топки. Изгледаше дека е подготвен да се врати на теренот, но само три дена подоцна дозна дека не е.

Местото на Надал во главната ждрепка го зазеде Индиецот Самит Нагал, а прв противник е Милош Раониќ.

Рафа не ги откри натамошните планови, но може да се претпостави дека ќе се подготвува за сезоната на земјана подлога која започнува во април. Мастерсот во Мајами кој се игра по Индијан Велс секако не беше во неговите планови.

Тој годинава одигра само еден турнир и тоа во Бризбејн каде по две убедливи победи во четвртфиналето беше поразен од Австралиецот Џордан Томпсон по тричасовен маратон. Потоа го откажа учеството на Австралија опен, а три недели подоцна и се полече и од турнирот во Доха.

Пред да дојде во Бризбејн, Надал немаше играно 11 месеци, од минатогодишниот Грен слем во Мелбурн. Следната станица веројатно би требало да биде Мастерсот во Монте Карло кој започнува на 7 април.

Scroll to Top