Top Sport

Facebook Twitter

„Пекол“ на Вуелта: Втора победа за Кинг, Јејтс нов лидер (видео)

Микс / 02.09.2018

Американецот Бенџамин Кинг стигна до втора етапна победа на Вуелта Еспања, откако беше најбрз на деветтата етапа, додека Британецот Сајмон Јејтс е новиот лидер пред првиот ден одмор на пеколната тринеделна шпанска класика.

Кинг (Дименжн Дата) беше прв на целта откако успеа да го победи Холанѓанецот Бауке Молема (Трек-Сегафредо), кој го „туркаше“ до максимум во последните километри од тешката 201 километри долга етапа од Талавера де ла Реина до искачувањето (надвор од категорија) Ла Коватиља.

29-годишниот Кинг победи и на четвртата етапа, меѓутоа овој триумф со три големи искачувања пред Ла Коватиља е дефинитивно неговиот најголем во кариерата, откако самиот колабираше по поминувањето на целта по 5 и пол часа на велосипед.

„Многу ми е лошо во моментов, но пресреќен сум. Не ми се верува“, изјави Кинг.

Јејтс (Мичелтон-Скот) беше деветти на етапата, преземајќи ја црвената маичка од Руди Молар, кој водеше на четирите рамни етапи, но не успеа да остане во игра на бруталното искачување. Јејтс има предност од една секунда зад шпанскиот ветеран Алехандро Валверде (Мовистар), а Наиро Квинтана (Мовистар) е уште 13 секунди зад нив.

Валверде и Квинтана се поранешни шампиони на Вуелта, додека Јејтс водеше 13 етапи на Џиро Д’Италија во мај, пред да ја загуби борбата со победникот Крис Фрум.

Scroll to Top