Охридскиот пливачки маратон ќе се одржи и традицијата ќе продолжи. Општина Охрид и Агенцијата за млади и спорт со здружени сили најавуваат дека една од најпознатите спортски манифестации во Македонија и во регионот ќе опстои и годинава ќе го има јубилејното 60. издание.
Засега има најави дека ќе учествуваат околу 20 пливачи, а градоначалникот на Охрид, Кирил Пецаков, истакна дека заинтересираност за помош има и од бизнисмени.
„Наградниот фонд од 10.000 евра ќе го покрие Агенцијата за млади и спорт, а за другите трошоци, Советот на Охрид ќе донесе одлука за доделување на 2 милиони денари од Општина Охрид. Тие ќе се префрлат на охридски клуб и ќе се организира маратонот. Уште пред два дена се известени пливачите за условите кои ќе бидат обезбедени и за условите кои ќе ги имаат од пристигнувањето во Охрид и засега имаме позитивни одговори. Бројката се уште не се знае, ќе имаме околу дваесетина пливачи. Маратонот е традиција, а традициите се работи кои ги одржуваат луѓето во тешките мигови“, изјави Пецаков на денешната прес – конференција.