Наскоро легендарната американска тенисерка Серена Вилијамс ќе наполни 40 години, а на последните два грен слема на тврда подлога дојде до полуфиналето. Одигра 4 финалиња на грен слем турнири по породувањето во 2018 година.
Сепак, повредите си го направија своето, па таа реши да се посвети на семејството и поради тоа нема да настапи на САД опен – турнирот кој започнува на 30. овој месец.
Наведе дека се советувала со лекарската екипа, па добила препорака да ја продолжи паузата откако имаше повреда на тетивата.
„Њујорк е еден од највозбудливите градови во светот, едно од моите најдраги места за играње. Ќе ми недостасуваат фановите, но и јас ќе навивам. Ви благодарам на пораките за поддршка“ објави Серена на социјалните мрежи.
Таа во кариерата има 23 грен слем титули, а на САД опен победила шестпати.