Шампионката од Ролан Гарос, Полјачката Ига Швјонтек ја почна одбраната на титулата на нејзиниот 20. роденден со победа над својата најдобра пријателка, Каја Јуван со 6:0/7:5.
Швјонтек прво доби прегратка од Јуван, со која се познаваат од јуниорските денови, но потоа не покажа милост, посебно во првиот сет.
„Никогаш не е лесно да се игра против најдобрата пријателка. Се обидуваш да го блокираш пријателството два часа и да се фокусираш на мечот. Мислам дека успеав во тоа. Се обидував да се фокусирам на Каја како кон било која друга тенисерка“, вели Швјонтек, која покажа дека е во одлична форма со победата на ВТА 1000 турнирот во Рим со 6:0/6:0 триумф над Каролина Плишкова.
Следна за Швјонтек е Швеѓанката Ребека Петерсон, која се намачи пред со 6:7(3)/7:6(8)/6:2 да ја победи Американката Шелби Роџерс.
Кај мажите, вториот носител, Русинот Данил Медведев имаше речиси совршен старт на турнирот, победувајќи го со 6:3/6:3/7:5 Казахстанецот Александер Бублик за помалку од два часа.