Ракометната репрезентација на Бразил се пласираше во четвртфиналето на Светското првенство и тоа го направи во голем стил.
Бразилците пласманот го обезбедија во претходното коло, но во последното коло од втората фаза го потврдија со триумф од 26:25 против Шпанија.
Бразил одмори неколку клучни играчи, но сепак на колена ја фрлија големата ракометна нација. Шпанија го освои петтото место во групата, што значи дека ќе биде меѓу 17. и 20.место во конечниот пласман. За Шпанија ова е најлош пласман во историјата на Мундијалите.
Во трилер завршница јужноамериканската сензација успеа да победи со гол разлика и со тоа да остане со само еден пораз на турнирот.
Бразил загуби само од Португалија (30:26) во првата фаза, а ги доби сите други натпревари, меѓу кои и оние со Норвешка, Шведска и сега Шпанија.
Бразил во среда во четвртфиналето ќе игра против бранителот на титулата Данска, додека Португалија ќе се соочи со Германија.