Ракометарките на Вардар утре и задутре во Љубљана ќе играат на вториот турнир од регионалната ВРХЛ-лига каде што сопернички им се екипите на Крим и Будуќност.
Првиот турнир во оваа конкуренција се одржа во средината на септември во Подгорица, а ЖРК Вардар победи на двете средби, 24:22 против Будуќност и 30:-27 со Крим.
Дуелите во Љубљана ќе бидат добра подготовка за екипата што ја предводи Ирина Дибирова за продолжување на сезоната во Лигата на шампионите.
„Нам ни требаат повеќе натпревари да играме. Но, ние секогаш се концентрираме само на нашата игра. Регионалната лига е за уигрување, но треба и да се победува. Тоа се натпревари во кои сакаме да пробаме и нови работи, да се уиграме, но ги задржуваме натпреварувачкиот дух и желбата за победа. На секој меч сакаме да победуваме. Така е секогаш, па и сега во Љубљана“, изјавила Дибирова за официјалната интернет-страница на клубот.
Дибирова за натпреварите во Љубљана нема да може да смета единствено на летното засилување, Драгана Цвииќ.
„Имаме неколку повредени играчи. Единствено, Драгана Цвииќ нема да патува поради болест, но сите други ќе патуваат и во зависност од тоа кој колку ќе може да издржи, толку и ќе игра. Треба да ја направиме тактиката и да се обидеме да одиграме на највисоко ниво. Не ми се допаѓа што немаме стабилност и константност во играта. Затоа, треба сите да бидат во форма, а не да чекаме само од оние што се во првиот состав. Треба сите да може да дадат свој придонес во играта. Има играчи што добро играат, но на некои уште им треба темпо и подигање на формата“, дополнила Дибирова.
Ракометарките на Вардар утре од 18.45 часот ќе играат против Крим, а ден подоцна од 16 часот противник ќе им биде Будуќност.