На еден ден пред финалиот натпревар од Лигата на шампионите, цените на билетите достигнуваат и до 10 илјади фунти. За да навивачите да го проследат мечот меѓу Ливерпул и Тотенхем во Мадрид, очигледно е дека ќе платат највисока цена за билет, споредбено со претходните години, кога цените беа од 1.200 до 3.000 фунти.
Дека има недостаток од карти се гледа и низ улиците на Мадрид. Навивачите на двата клуба пристигнаа во градот, но немаат сите обезбедно карти. Тие со натписи шетаат низ фан-зоните барајќи да купат билет од црниот пазар.
„Потребен ми е билет за финалето од Лигата на шампионите“, пишува на листовите од оние кои немаат билет.
Високите цени не се проблем за навивачите да купат билет за финалето од нелегални продавачи. Сепак, познавачите тврдат дека тие треба да бидат внимателни бидејќи можат да бидат измамени. Во изминатите години имало случаи кога навивачите плаќаа големи суми за билети, кои не можеа да ги искористат бидејќи биле фалсификувани.
Огромниот скок на цените се должи поради малиот број на билети кој УЕФА го додели на двата клубови.
Од Мадрид за „Топспорт“, Кристијан Ландов