Легендата на бразилскиот фудбал и мнозински сопственик на Реал Валјадолид, Роналдо Назарио призна дека Килијан Мбапе е неговото „засилување од соништата“ и не би се двоумел да го купи доколку го има буџетот на Реал мадрид.
Роналдо купи 51 отсто од шпанскиот клуб во 2018 година и успеа да ги врати во Ла лига, каде што сонува да ги донесе најталентираните млади фудбалери. Тој во својата кариера играше во дел од најмоќните клубови на светот, како Реал Мадрид, Барселона, Интер и Милан и го избра ѕвездата на Пари Сен-Жермен како идеално засилување.
„Веднаш би потпишал со Мбапе, бидејќи тој најмногу ме потсетува на мене и на моите најдобри денови. Халанд? Тој е голем фудбалер, но уште е млад и имаше одлична сезона, ќе видиме каква ќе е следната. Реал Мадрид го имаат Бензема напред и не би доибивал многу шанси“, вели Роналдо.
Тој се двоумеше околу тоа кој се најдобрите фудбалери во историјата, и не се постави себе во оваа колекција.
„За мене, најдобри на светот би биле овие четири имиња: Пеле, Марадона, Лионел Меси и Кристијано Роналдо. Тие се во топ 4 сигурно“, вели Роналдо.