Барселона ќе игра во финалето во Купот на Кралот откако со вкупен резултат 3-0 го доби полуфиналниот двомеч со Валенсија. По победата од 1-0 на домашен терен, Барселона победи и во реваншот на „Местаља“ со 2-0.
Барселона ќе го брани трофејот во Купот на Кралот против Севилја, која во средата го елиминира Леганес со вкупен резултат 3-1.
На „Метстаља“ во Валенсија, Барселона ги искористи своите шанси за разлика од домашниот тим чии фудбалери не успеаја да ја затресат мрежата на Силесен.
Родриго во 14.минута ја погоди гредата при резултат 0-0, а Гаја во ситуација „еден на еден“ не успеа да го совлада Силесен при резултат 0-1. Холанѓанецот на брилијантен начин го одбрани неговиот удар.
Барселона до предност дојде со голот на Фелипе Кутињо во 49.минута. Бразилецот го постигна својот прв гол во дресот на каталонскиот гигант.
Конечниот резултат го постави Ракитиќ во 82. минута. Асистент за двата гола беше Луис Суарез.
Финалето на купот ќе се одигра во мај, а местото на одигрување ќе биде дополнително одредено.