Топспорт во Порто,
Никола Ѓуровски
Стефан Ристовски како капитен на репрезентацијата на Македонија ја предводи армијата на Благоја Милевски во обидот за ново светско чудо во фудбалот и пласман на мундијалот во Катар. По елиминацијата на Италија, сега македонскиот национален тим е во Порто, каде вечерва на „Драгао“ ќе го има мечот на животот против Португалија на Кристијано Роналдо.
Во селекцијата на Македонија е и Стефан Спировски. Тие двајца беа дел од репрезентацијата и пред една деценија, кога Македонија одигра 0-0 против Португалија. Тогаш селекциите на Португалија и на Македонија одиграа пријателски натпревар во Леирија.
Од тој тим на Португалија се уште играат капитенот Кристијано Роналдо и искусниот играч за врска, Жоао Мутињо. Овојпат пресметката е многу позначајна, влогот е виза за мундијалот во Катар.
