Чиле поднесоа официјално барање до ФИФА во кое бараат директен пласман на Светското првенство во Катар на местото на Еквадор, поради тоа што наводно Еквадорците играле со фудбалер кој немал право на настап во текот на квалификациите.
Фудбалерот за кој се сомневаат Чилеанците е Бајрон Кастилјо, кој наводно е роден во Колумбија три години пред документацијата која кажува дека е Еквадорец, и според правилата на ФИФА следува казна за секој ваков инцидент.
Истрагата претходно донесе казна за 75 младински фудбалери кои биле регистрирани во Еквадор со лажни документи, а Кастилјо бил дел од тој процес, и Чилеанците бараат „правда“.
„Според сите информации и документација, фактите покажуваат сериозно прекршување на правилата и побаруваат истрага од ФИФА. Секогаш сме ги почитувале принципите на ферплеј и се надеваме дека и другите федерации ќе го направат истото“, изјави Пабло Милад, претседателот на Чилаеанската фудбалска федерација.
Еквадор завршија на четвртото место во јужноамериканската квалификациска група за Катар, со што добија автоматски пласман, додека Чиле беа само на седми со Перу (кои ќе играат интерконтинентален бараж) и Колумбија меѓу нив. Меѓутоа, Кастилјо не играл во мечевите против тие нации, додека играл против Чиле и Чилеанците сметаат дека треба да ги добијат шесте поени од двата меча.