Хрватскиот репрезентативец Ловро Мајер е избран како наследник на Лука Модриќ и на лето треба да се пресели во Реал Мадрид за сума од 60 милиони евра, откриваат медиумите во Франција. Но, во трката за играчот за врска на Рен е и градскиот ривал Атлетико Мадрид.
Мајер минатата година пристигна во Рен во трансфер вреден 12 милиони евра од Динамо Загреб. Многу брзо се наметна како важен играч на францускиот тим, за кој одигра 55 натпревари, постигнувајќи осум гола и забележувајќи 12 асистенции.
Неговиот напредок и добрите игри за хрватската репрезентација не останаа незабележани и падна во очите на Реал Мадрид.
Договорите на Лука Модриќ и Тони Крос важат до крајот на актуелната сезона, а иако желбата на клубот е двајцата да останат, сепак, Реал сака да доведе и адекватна замена.