Top Sport

Facebook Twitter

„Џентлменот“ Ботас го пушти Хамилтон за победа во Сочи и 50 поени предност

Автомото Makfax / 01.10.2018

Луис Хамилтон ја продолжи својата победничка низа со триумф на Руското ГП во Сочи пред својот колега од Мерцедес, Валтери Ботас и пред Себастијан Фетел во Ферари, за да ја зголеми предноста во генерален пласман на фантастични 50 поени пред Фетел за петтата светска титула да е многу блиску.

Клучен за победата на Хамилтон беше „великодушниот“ потег на неговиот колега, Финецот Ботас, кој го пропушти во средината на трката. Хамилтон го задржа Фетел на стартот во Сочи, но по влегувањата во боксот беше накратко зад него пред да го врати водството.

Кога Фетел повторно го постави под „притисок“ во 25. круг, Мерцедес преку радиото му порачаа на Ботас да го пуштат колегата, и Финецот се откажа од шансата да стигне до својата прва победа оваа сезона. На крајот, ова е осма победа на Хамилтон во 2018 и петта во последните шест трки, и трет 1-2 финиш за Мерцедес.

„Ова беше тежок ден за нас. Валтери заврши фантастична работа цел викенд и беше вистински џентлмен што ме пушти. Сфаќам дека беше тешко за него, но тој заврши брилијантна работа“, изјави Хамилтон по трката која бргу ќе се заборави, но тимските наредби сигурно ќе бидат под дискусија.

Кими Раиконен го освои четвртото место за Ферари со 14 секунди предност пред Макс Ферстапен во Ред бул, кој беше пред колегата Даниел Рикардо. Поени уште освоија и Шарл Леклер и Кевин Магнусен за Заубер, и Естебан Окон и Серхио Перез за Форс Индија.

Scroll to Top