Селекторот на англиската репрезентација Герет Саутгејт вели дека сите во земјата треба да се гордеат со играчите.
Гордиот Албион загуби од Шпанија со 2:1 во финалето на Европското првенство.
„Денес не успеавме. Не ја чувавме доволно добро топката. Во првото полувреме добро се браневме, им ги ограничивме можностите, но не бевме добри со топката додека не примивме гол. Потоа одигравме пристојно, израмнивме“, вели Саутгејт и додава: „Мислам дека на крајот плативме за физичкиот напор за време на турнирот, игравме продолженија, како и за тоа што ја немавме топката во нашите нозе во финалето. Нозете почнаа да се заморуваат, тогаш дојдоа грешките, но се држевме до 85. минута“.
Неколку пати Саутгејт повтори дека е горд на тимот и дека земјата треба да се гордее со играчите.
„На крајот загубивме од подобар тим. Ќе анализираме, но јасно ми е – клучен беше поседот на топката“.
Саутгејт е на клупата на Англија од 2016 година.
„Тешко е да се зборува за тоа (дали ќе остане на функцијата) веднаш по поразот, ја водев Англија до финалето двапати по ред, тоа никој претходно не го направил, но дојдовме тука да освоиме трофеј и не го направивме тоа. “, заклучи Саутгејт.