Нотингем Форест ја одбиле првичната понуда од Манчестер Сити за нивниот играч од средниот ред Елиот Андерсон. Интересот на Сити за 23-годишниот англиски репрезентативец беше официјално потврден, а се очекува Андерсон да го напушти „Сити Граунд“ ова лето. Минатата недела беше објавено дека играчот повеќе сака да се пресели на „Етихад“ отколку во редовите на градскиот ривал Манчестер Јунајтед.
Андерсон зад себе има одлична сезона со Форест, во која имаше 50 настапи, а неговите добри настапи му ја донесоа поканата од селекторот Томас Тухел во англиската репрезентација за Светското првенство.
Се вели дека Форест бара сериозна сума, со која клубот сака да го урне британскиот рекорд, односно сумата од 120 милиони евра колку што Арсенал му ги плати на Вест Хем во 2023 година за Деклан Рајс.
Сити долго време го следи Андерсон, кој дојде низ младинската академија на Њукасл. Иако играчот моментално се подготвува за турнирот во САД, Канада и Мексико, се очекува преговорите меѓу клубовите да продолжат.
Со заминувањето на капитенот Бернардо Силва, приоритет на Сити е зајакнување на средниот ред, а Андерсон е на врвот на листата на желби. Играчот од средниот ред на Њукасл, Сандро Тонали, се споменува меѓу играчите што клубот исто така ги цени, а странските медиуми објавуваат дека италијанскиот репрезентативец се следи како долгорочна цел.
Од друга страна, клубот би можел да го напушти Нико Гонзалез, кој не беше поканет во шпанската репрезентација за Светското првенство и минатата сезона падна во втор план под тренерот Пеп Гвардиола.
Изворите наведуваат дека Сити бара и десен бек кој би му бил конкуренција на 28-годишниот Матеус Нуњес.
Foto/ Depositphotos