Првите два меча од Лигата на шампионите оваа недела донесоа навистина изненадувачки резултати – Црвена звезда благодарение на Милан Павков го победи Ливерпул со 2:0, додека мизеријата на Монако продолжи и под водство на Тјери Анри, откако, тимот од кнежевството доживеа домашна катастрофа од 0:4 од Клуб Бриж!
Црвена звезда своите први настапи во Лигата на шампионите по речиси 3 децении ги започна со едно домашно реми (0:0 против Наполи) и два високи гостински порази (6:1 од ПСЖ и 4:0 од Ливерпул), така што малкумина ќе се обложеа дека домашниот меч со Ливерпул ќе го добијат.
Сепак, првото полувреме целосно му припадна на поранешниот европски шампион, и тимот на Јирген Клоп го доживеа вториот пораз оваа сезона во ЛШ. Човек на одлука беше 24-годишниот Милан Павков кој во неполни 10 минути во првото полувреме ги „здрви“ фаворитите од Англија.
Во 22. минута од мечот, Павков беше највисок во скокот по корнерот на Марин за 1:0, а во 29. минута од огромна далечина истиот фудбалер да постигне фантастичен гол за 2:0. Ливерпул во второто полувреме имаше повеќе од играта, но не успеа да постигне гол.
Во Монако пак, „црно“ му се пишува и на Тјери Анри, кој беше донесен како „спасител“ на поранешниот француски шампион, а наместо тоа доживува историски порази. Бриж го начека тимот во криза и му даде четири гола на „Луј втори“ за неверојатен пораз.
Фото: ЕПА
ЦРВЕНА ЗВЕЗДА – ЛИВЕРПУЛ 2:0
МОНАКО – КЛУБ БРИЖ 0:4