Возачот на Ред Бул, Макс Ферстапен, победи на лудото австралиско Гран-при, стартуваше од пол-позицијата и дојде до првата победа во Мелбурн. Актуелниот светски шампион славеше пред Луис Хамилтон од Мерцедес на второто место и пред Шпанецот Фернандо Алонсо (Астон Мартин) на третото место. Топ 5 листата ја заокружуваат Ленс Строл во Астон Мартин и Серхио Перез во Ред Бул.
Воочливо е дека на врвот нема ниту еден возач на Ферари, а ги нема ниту до крајот на листата на која поради хаосот во завршницата има само 12 имиња. Причината е дебаклот што го доживеаја Шарл Леклер и Карлос Саинц.
Леклер излета веднаш на старот и не ја заврши трката, додека Саинц беше жртва на луда завршница на трката во која имаше контакт со Алонсо, што се случи пред третото црвено знаме.
Трката заврши под безбедносното возило и бидејќи Саинц доби казна од пет секунди пред последниот рестарт, падна на последното, 12. место.