Тренерот на ФК Вардар, Александар Васоски ја напушта клупата на скопскиот клуб.
Денешниот триумф на „црвено-црните“ во Струмица против Беласица со 3-0 беше последниот меч за популарниот „Тетовче“ на клупата на Вардар.
Тој се заблагодари за поддршката и испрати апел за спас на клубот.
„Почитувани спортски пријатели, навивачи на Вардар, почитувана спортска јавност. Сакам во името на стручниот штаб да ви се заблагодарам за поддршката која му ја дававте на Вардар во овој тежок период за клубот. Почитувани вардарови фудбалери, вашите имиња треба да се впишат со златни букви во историјата на овој клуб, затоа што не дозволивте клубот да доживее црно сценарио. Што се однесува до мене, јас ветив дека до декември ќе останам, но немам веќе сили да се борам. Затоа од денеска официјално не сум тренер на Вардар. Благодарност до `Комитите` и сите поддржувачи на Вардар и мој апел до надлежните – да не се дозволи најсветото нешто во македонскиот фудбал да згасне“ – рече Васоски по денешниот меч.
И покрај големиот број на заминувања од Вардар, по напуштањето на Самсоненко на „црно-црвеното“ семејство, Васоски остана на кормилото на клубот и со сите расположиви сили се бореше клубот да не згасне. Минатата сезона Вардар под негово водство ја освои титулата иако комплетното првенство не се доигра поради пандемијата на коронавирусот.