Џанлуиџи Буфон ќе одговара пред Дисциплинската комисија на УЕФА по неговиот црвен картон и конфликтот со судијата Мајкл Оливер во второто четврт-финале со Реал Мадрид.
На „Сантијаго Бернабеу“, Јувентус имаа 3:0 водство со што ја елиминираа предноста на Реал, но Мехди Бенатија го фаулираше Лукас Васкез во шестнасетникот во последните минути, по што судијата Оливер реши да додели пенал.
Буфон агресивно реагираше и доби директен црвен картон, по што по крајот на мечот изјави дека Англичанецот има „канта за ѓубре“ наместо срце. Случајот на Буфон ќе биде разгледуван на 31 мај.
Буфон го предводеше Јувентус до титула од Копа Италија, а овој викенд тимот на Масимилијано Алегри ќе ја обезбеди и седмата титула во Серија А. 40-годишниот голман најави дека ќе се пензионира на крајот на сезоната, но беше дел од италијанската репрезентација во пријателскиот меч со Аргентина во март и останува да се види неговата конечна одлука.
Фото: ЕПА