Пари Сен Жермен направи голем чекор кон трансферот на талентираниот крилен играч Јан Диоманде, откако тој се согласил на петгодишен договор.
Како што објавија трансфер инсајдерот Дејвид Орнштајн и новинарот на „RMC Sport“ Фабрис Хокинс, 19-годишниот фудбалер одлучил да ја продолжи кариерата во редовите на актуелниот европски шампион, и покрај сериозниот интерес од Ливерпул.
Англискиот гигант се обиде да го убеди Лајпциг со понуда вредна 100 милиони евра во претходните денови, но германскиот клуб ја одби.
Сега ПСЖ ја презеде иницијативата, а сè што останува е да се постигне договор со Лајпциг во врска со обештетувањето. Минатото лето, германскиот клуб му плати на Леганес 20 милиони евра за Диоманде и го врза со договор до 2030 година.
Првичниот план беше да остане барем уште една сезона, но интересот на европските гиганти би можел да ја промени ситуацијата.
Според француските медиуми, Лајпциг бара околу 130 милиони евра, додека ПСЖ не планира да оди толку високо.
Сепак, се очекува преговорите да продолжат, а Диоманде би можел да стане најскапата продажба во историјата на германскиот клуб, надминувајќи го трансферот на Јошко Гвардиол од 90 милиони евра.
Диоманде има одлична сезона зад себе во дресот на Лајпциг, за кој постигна 13 гола и забележа 10 асистенции во 36 натпревари во Бундеслигата и Купот на Германија.
Доколку трансферот се реализира, репрезентативецот на Брегот на Слоновата Коска ќе ја засили веќе импресивната офанзивна линија на ПСЖ, во која се наоѓаат Усман Дембеле, Дезире Дуе, Хвича Кварацхелија и Бредли Баркола.
Foto/ Depositphotos