Фудбалерот на Барселона и португалски репрезентативец Жоао Феликс изјави дека би сакал да игра на левата крилна позиција во каталонскиот клуб и додаде дека е задоволен како бил пречекан во новиот клуб, пренесува каталонски Спорт.
Феликс е член на Атлетико, но до крајот на сезоната ќе игра како позајмен во Барселона. За Португалија играше на натпреварот против Луксембург во квалификациите за ЕП во 2024 година, а на крајот од мечот успеа да се запише во листата на стрелците.
„Се чувствувам добро и самоуверено иако во последно време не играв многу. Подготвен сум и ќе направам се за да и помогнам на Барселона да постигне добри резултати“, изјави Феликс, кој вториот дел од минатата сезона го мина како позајмен во Челзи.
За Барселона дебитираше пред десетина дена на мечот со Осасуна (2:1).
„Се чувствувам удобно да играм на лево крило. Мислам дека тоа е позицијата на која ќе играм кај Чави. Тимот срдечно ме пречека. Тимот е млад, а ова е добра група која сака да победува“, додаде португалскиот фудбалер.
Барселона во следното коло на стадионот Монжуик ќе го пречека Бетис во Ла Лига.