Единствените два клуба кои во својата историја имаат освоено титула од Лигата на шампионатите, а се преостанати во ждрепката оваа сезона се Баерн Минхен и Барселона и вечерва се среќаваат во супер-пресметка на „Естадио да Луж“ во Лисабон во најинтересното четврт-финале во европската елита.
Барселона имаа одличен старт во ЛШ оваа сезона, освојувајќи ја групата со Борусија Дортмунд и Интер без загубен натпревар, но перформансите на тимот паднаа по отпуштањето на Ернесто Валверде во јануари, а новиот тренер Кике Сетиен успеа да ја загуби титулата од Ла лига по рестартот иако имаа предност од два поени пред Реал Мадрид.
Уште позагрижувачки за тренерот на Барселона, првата ѕвезда Лионел Меси неколку пати отворено го критикуваше Сетиен и стратегијата на клубот, посочувајќи дека така не може да се стигне до толку посакуваниот трофеј од Лигата на шампионите. Сепак, токму Меси беше клучниот човек при победата над Наполи, и со 31 гол и 26 асистенции оваа година иако има 33 години повторно ќе биде човекот од кого се очекува (пре)многу. Пораз од Баерн сигурно ќе предизвика уште еден несакан потрес во Каталонија и речиси сигурно ќе значи крај за Сетиен.
Баерн Минхен исто така го сменија тренерот оваа сезона, откако Нико Ковач беше заменет од неговиот поранешен помошник Ханси Флик, кој иако немаше искуство со водење на големи тимови, успеа да ги врати Баварците во трката за титулата и на крајот да се стигне до германската двојна титула.
Под Флик, Баерн Минхен победи во 29 од 32 меча за да има најдобар просек по поени по натпревар (2.76) во историјата на клубот.
Прва ѕвезда, несомнено е полскиот напаѓач Роберт Левандовски, кој на 31 година ја игра својата најдобра сезона. Тој постигна 13 голови во само седум меча, за да стигне до само четири гола од рекордот на Кристијано Роналдо во 2013/14. Со три гола и четири асистенции против Челси, Полјакот е неверојатна опасност за противничките голмани.
Обложувалниците го сметаат Баерн за огромен фаворит во пресметката, а победникот од нивниот дуел сигурно ќе биде фаворит за европската титула. Барса и Баерн се сретнаа во четврт-финалињата во 2008/09 и полуфиналињата во 2012/13 и 2014/15, а победникот во сите случаи подоцна го крена трофејот.