Сопственикот на Челси, Тод Боели, има идеја да се обиде да ја доведе ѕвездата на Пари Сен Жермен, Лионел Меси на „Стемфорд бриџ“ претстојното лето. 35-годишниот Аргентинец ќе го напушти „Паркот на принцовите“ како слободен агент на крајот од сезоната кога ќе му истече договорот. Затоа, американскиот бизнисмен сака да ја искористи ситуацијата и да го убеди да го облече дресот на Челси, тврдат медиумите на Островот.
Барселона е фаворит за привлекување на Меси, затоа што фудбалерот дава јасни сигнали дека сака да се врати во клубот каде го мина најголемиот дел од кариерата. Проблемот е што Каталонците имаат сериозни потешкотии да му обезбедат пристојна плата, а тоа може да ги запре преговорите меѓу двете страни. Покрај тоа, интерес за Меси има и од Саудиска Арабија, иако Аргентинецот не е особено заинтересиран за таква опција.
Сега и Челси се вклучува во редот за неговиот потпис. Проблемот за „сините“ е што и тие немаат со што да го воодушеват. Тимот нема да игра во Европа следната година, а големата плата на напаѓачот, исто така, може да биде проблем бидејќи лондончани не можат да продолжат со големите трошења ако сакаат да ги исполнат барањата за финансиски фер-плеј.