Барселона успешно го мина гостувањето кај Еибар на отворањето на деветтото коло во Ла Лига. Каталонците на „Ипуруа“ победија со 3:0 и со натпревар повеќе од Реал го презедоа врвот на табелата.
Екипата на Ернесто Валверде не одигра некој спектакуларен натпревар, меѓутоа максимално ја искористи инспирацијата на своите најголеми ѕвезди Гризман, Суарез и Меси.
Играчите на „Блауграна“ упатија пет удари во рамките на голот на Еибар, од кои постигнаа три гола.
Гризман го отвори резултатот во 13 минута, кога ја искористи асистенцијата на сонародникот Ленгле. До крајот на првиот дел се истакна голманот на Еибар Дмитровиќ кој со спектакуларна интервенција го спречи Меси да постигне гол.
Во вториот дел триаголникот Гризман-Меси-Суарез креираше два гола. Најпрвин Меси постигна гол во 58 минута, а потоа Суарез во 63 минута ги разреши дилемите околу победникот.