Легендата на германскиот фудбал, Јирген Клинсман смета дека Ралф Рангник ги има сите предизпозиции да направи силен Манчестер Јунајтед.
Германецот и официјално го презема кормилото на тимот и ќе има можност да дебитира утре од 15 часот на „Олд Трафорд“ против Кристал Палас.
„Во Германија Ралф е познат под прекарите „Архитект“ и „Професор“. Тој е фудбалски поткован, изгради од темели неколку фудбалски клубови и ги направи учесници во Лигата на шампионите. Видете го Лајпциг“ изјави Клинсман за „Скај спорт“.
Тој смета дека Рангник е сестран и многу темелен во својата работа.
„Работник е, кога ќе започне некој проект, секогаш дава се од себе. Ќе го вложи своето знаење и искуство проектот да успее. Ќе даде свое мислење за секој дел од сложувалката, а Јунајтед е огромен клуб – огромна сложувалка“ вели Клинсман.
Германецот им порача на првите луѓе во Јунајтед да бидат флексибилни со Рангник.
„Ќе биде фасцинантно да се види колку луѓето околу него се подготвени да бидат со отворен ум, да ги прифатат неговите идеи и размислувања“ заклучи Клинсман.