Првото „Ел класико“ во новата сезона во Ла лига му припадна на Реал Мадрид, кој на „Сантијаго Бернабеу“ стигна до 3:1 победа над Барселона, зголемувајќи ја мизерната недела на каталонскиот клуб по 3:3 ремито со Интер со кое дојдоа на чекор од елиминација во Лигата на шампиони.
Двата клуба во мечот влегоа со совршен скор и израмнети на врвот на табелата, и сега тимот на Карло Анчелоти ја има бодовната, но и психолошката предност во во што очекуваме да биде тесна трка за шпанската титула.
До предноста, „кралевите“ дојдоа веќе во 12. минута, кога Винисиус Жуниор успеа да биде побрз од целата одбрана на Барселона во брз контранапад, и по неговиот обид, Карим Бензема не згреши за 1:0. Водството беше удвоено во 34. минута, кога Феде Валверде со фантастично прецизен удар во далечина не му даде шанса на Марк-Андре Тер-Штеген.
Реал го започна второто полувреме на 250. „Ел класико“ со уште еден гол во мрежата на лутите ривали, преку Бензема, но голот беше поништен поради офсајд ситуација. Со влегувањето во игра на Торес, Гави и Фати, играта на Барселона беше подобра, и кога изгледаше дека Реал лесно ќе го запечати триумфот, Феран Торес во 83. минута по асистенција на Роберт Левандовски намали на 2:1 за нервозен финиш на мечот. Меѓутоа, во 89. минута од мечот Ерик Гарсија го „нагази“ Родриго за пенал за Реал Мадрид, кој сигурно го реализираше токму Родриго.