Натпреварот од 26. коло на шпанското фудбалско првенство меѓу Гранада и Валенсија, кој требаше да се одигра во сабота е одложен откако градот Валенсија прогласи тридневна жалост поради пожарот во кој загинаа неколку лица. Новиот датум на натпреварот се уште не е познат.
Челниците на Ла Лига позитивно одговорија на барањето на фудбалскиот клуб Валенсија, да го одложат натпреварот, закажан за 14 часот. Градот Гранада и неговиот фудбалски клуб изразија солидарност со граѓаните на Валенсија откако во четвртокот попладне избувна пожар во зграда, во кој досега загинаа четири лица, а по 14 се уште се трага.
Во градот Валенсија откажани се сите настани, вклучително и второлигашкиот натпревар помеѓу Леванте и Андора.
Валенсија е на осмото место, а Гранада е претпоследна на табелата во Примера.