Лионел Меси очигледно одлучи, неговиот следен клуб ќе биде американскиот Интер Мајами. Сите угледни извори денеска тврдат дека Барселона не можела да ги исполни сите услови и да гарантира дека договорот на Меси би можел да биде регистриран поради проблеми со финансискиот фер-плеј.
Ова го искористи Интер Мајами, кој на Меси му посочи сериозен проект, бидејќи Аргентинецот ќе добива бонуси од заедничкиот спонзор „Адидас“, како и од „Епл“. Во исто време, Меси ќе има можност да купи франшиза во МЛС лигата за многу помалку пари, како некогаш Дејвид Бекам.
Бекам е сопственик на Интер Мајами и сака да направи една од најголемите фудбалски приказни во Америка. Се шпекулира дека по Меси ќе дојдат и Серхио Бускетс и Жорди Алба.
Меси се обиде на секој начин да се врати во Барселона, тој се согласи да игра бесплатно, но тоа беше законски невозможно. Се шпекулираше дека преку Интер Мајами може да замине на позајмица во Барселона, но американскиот клуб тоа го одби.
Меси сакаше што поскоро да ја реши својата судбина, а Барса не можеше да ја реши финансиската стабилност на почетокот на јуни, бидејќи за тоа е неопходно да се продаваат играчи.
Дури и Жерар Ромеро, кој беше најпозитивен во оваа сапуница, неодамна изјави дека има 1% за враќање на Меси во Барселона.