Нова серија откритија за односот на некои од поранешните шефови на Барселона кон Лионел Меси ги разбранува духовите во Шпанија. Каталонското издание „Ел Периодико“ објави извадоци од разговор на WhatsApp меѓу донеодамнешниот претседател на клубот Хосеп Марија Бартомеу и тогашниот шеф на правниот оддел Роман Гомез Понти.
Гомез Понти во своите пораки отворено го навредува Меси, нарекувајќи го „хормонално џуџе“ и „канален стаорец“.
На 22 март 2020 година, Гомез Понти напишал имејл до Бартомеу со предлог да се намалат платите на фудбалерите поради растечката пандемија Ковид-19.
„Не би било лоша идеја да се објават мултимилионските договори на првиот тим за луѓето јавно да ги критикуваат“, му напиша тој на тогашниот директор на клубот.
„Ел Мундо“ објави дел од договорот на Меси на 31 јануари 2021 година, што предизвика скандал, а полицијата во Шпанија сè уште го истражува случајот „Барселогејт“, поврзан со наводите дека поранешното раководство на Барса открило доверливи податоци за договорите на Лионел Меси и на Жерар Пике.
Откако беше објавен договорот на Аргентинецот, Бартомеу беше бомбардиран со прашања за тоа што се случува, а Гомез Понти му напишал: „Барто, навистина, не можеш да бидеш толку добар човек со тој канален стаорец. Клубот му даде сѐ и тој се посвети на наметнување трансферна диктатура“.
„Ни здодеа и ни се смачи од уцените и грубоста на ова хормонален џуџе кон сите нас кои работиме во клубот. Својот живот и го должи на Барселона. Се надеваме дека тој маршира меѓу рамнодушноста на луѓето, што е најлошото што може да му се случи“, му напиша Гомез Понти и на Бартомеу и на другите од раководството на клубот во тоа време.
Сега истрагата на шпанските власти за овој случај продолжува, а доколку се докаже вината на поранешните челници на Барселона, тие се соочуваат со сериозна казна.