Левото крило на бундеслигашот Лајпциг, Хосе Ангел Есморис Тасенде – попознат како Ангелино денес без сомнение е еден од најдобрите играчи во Бундеслигата на својата позиција. 24-годишниот играч во интервју за „Билд“ со остра изјава го нападна менаџерот на Манчестер Сити, Пеп Гвардиола.
Ангелино како младо момче од Депортиво стигна во Сити и веднаш беше испратен на „калење“. Играше во МЛС лигата, па во Шпанија и во Холандија. ПСВ Ајндховен во 2018 година го прибра во своите редови, па по само една сезона, „граѓаните“ повторно го доведоа во Манчестер. Сепак, Пеп се чини никогаш не му даде вистинска шанса на својот сонародник.
„Откако се вратив во Сити од ПСВ одиграв само два подготвителни натпревари и повеќе не ми даде шанса. Ме уби, и мене и мојата самодоверба. Ми пресуди по само два меча“ вели Ангелино.
Затоа Јулијан Нагелсман му даде можност во Лајпциг и Шпанецот ја искористи.
„Голема е разликата меѓу нив двајца, едниот ми даде самодоверба и ме пушти да играм, другиот не. Мора за такво нешто да бидете храбар, а Јулијан тоа е“ смета Шпанецот.