Лацио денеска и официјално ја потврди разделбата со Маурицио Сари, кој во вторникот поднесе оставка на функцијата.
Во соопштението објавено во средата, клубот додаде дека досегашниот помошник на Сари, Џовани Мартучиело, ќе го предводи тимот на натпревар. Клубот не објави дали тој ќе биде привремено решение или ќе остане на клупата до крајот на сезоната.
Сари го презеде Лацио во летото 2021 година, а во првата сезона со Римјаните го зазеде петтото место во Серија А. Во претходната сезона „небесносините“ завршија на второто место. Оваа сезона, сепак, резултатите на тимот не се добри, Лацио е на деветтото место со 12 победи, 4 нерешени и 12 порази.
Според „Спорт Италија“, Сари ги обвини играчите за неговиот отказ.
„Видов дека повеќе не сте со мене. Некои од вас се многу различни од она што бевте минатата сезона. Решив да поднесам оставка. Ако јас сум проблемот, ќе се повлечам за да сфатите што всушност правите оваа сезона“, наводно рекол искусниот стручњак.
Меѓу наводните наследници на Сари се споменуваат млади тренери како Игор Тудор и Рафаеле Паладино (Монца), како и поранешниот напаѓач на Лацио, Мирослав Клосе.