Иако трансферот уште не е официјализиран, Челси се надеваат дека Маурицио Сари ќе биде нивни нов менаџер уште оваа недела откако англиските медиуми тврдат дека е склучен договор за прекин на договорот со неговиот италијански сонародник, Антонио Конте.
Сари, исто така наводно, се договорил за раскин со договорот со Наполи, а условно е договорен и двегодишниот договор со Челси.
Според „Дејли мирор“, 59-годишниот Италијанец веќе почнал да ја планира преселбата во Лондон, планирајќи да живее, работи и спие на тренинг-терените на „сините“. Иако не се познати деталите, очигледно е дека Сари нема како повеќе тренери во Премиер лигата да бара сместување во хотел со пет ѕвездички, и наместо тоа ќе биде задоволен од условите во Кобем, каде што има гостински апартман со пет спални, кој го изгради Роман Абрамович.
Оваа куќа исто така беше користена од Андре Вилјаш-Боаш, кој осум месеци беше тренер на Челси во 2011/12. Сега, само за страствениот пушач Сари, ќе биде потребно да се обезбедат доста пепелници.