Младинската фудбалска репрезентација на Македонија го доживеа првиот пораз во квалификациите за Европското првенство во 2021 година, откако во Алкоркон загубија со 3:0 од фаворитот во нашата група, репрезентацијата на Шпанија.
Мечот започна лошо за селекцијата на Благоја Милевски, откако уште во седмата минута младата „фурија“ дојде до водство преку Ману Гарсија. Во 47. минута од мечот, Никола Серафимов си постигна автогол, а конечните 3:0 ги постави Адрија Педроза во 87. минута. Во второто полувреме од мечот во игра влезе и супер-талентот на Барселона, Ансу Фати, во втор старт за шпанската репрезентација.
Со поразот, Македонија останува на третото место на табелата со 7 поени, колку што има и второпласираниот Израел, додека Шпанците се први со четири победи во четири меча и 12 поени. Следен дуел за момците е гостувањето кај аутсајдерот Фарски Острови, веќе во понеделник.