Менаџерот на Манчестер Јунајтед, Ерик тен Хаг денеска изјави дека тимот ќе биде без помош од дури петмина фудбалери на утрешниот натпревар против Челзи.
„Добри сме во нападот и во средниот ред, но во последната линија ни недостасуваат опции“, изјави денеска Холанѓанецот на прес-конференцијата.
Ентони Марсијал, Лук Шо и Тајрел Маласија од претходно не конкурираат за место во тимот, а Лисандро Мартинез и Виктор Линделоф ќе бидат надвор од терените во следните неколку недели поради повреди.
Холандскиот стручњак објави две добри вести, Рафаел Варан и Џони Еванс се опоравија од повредите и ќе бидат во конкуренција за утрешниот натпревар од 30. коло на Премиер лигата, во кој „црвените ѓаволи“ ќе му гостуваат на Челзи.