„Бирис норте“, ултрасите на Севилја, го нападнаа клубот за одлуката да му дадат договор на поранешниот капитен на Реал Мадрид, Серхио Рамос, кој потпиша договор со својот поранешен клуб откако стана слободен играч по крајот на договорот со Пари Сен-Жермен.
Рамос во 2004 година си замина од Севилја да потпише за Реал Мадрид кога имаше само 19 години, и тој трансфер уште ги лути навивачите на Севилја, кои исто така му замеруваат на Рамос за некои негови потези во меѓусебните дуели на двата шпански клубови.
„Како ултраси на Севилја веќе 50 години, сакаме да го отфрлиме овој трансфер. Не сме мотивирани од омраза или од одмазда, туку од љубов и гордост за нашиот клуб, историјата и неговите навивачи. Сметаме дека самата идеја за овој трансфер покажува недостаток на почит кон вредностите кои го направија овој клуб, за симболите и легендите кои го бранеа нашиот грб и за илјадниците навивачи на Севилја кои страдаа од презирот на овој фудбалер во минатото. Овој трансфер е добар само за интересите на одредени менаџери кои не разбираат што го прави Севилја голем клуб и кои гледаат само на личните економски интереси“, велат од навивачката група.