Потпретседателот на Интер, Хавиер Занети вели дека е возбуден за финалето од Лигата на шампионите против Манчестер сити, нарекувајќи го мечот „огромна шанса“ за неговиот клуб и дека во фудбалот никогаш предвреме не се знае победникот.
Дел од навивачите на „нераѕурите“ можеби беа обесхрабрени од начинот на кој Сити со 4:0 го „здроби“ Реал Мадрид во полуфиналето, но Занети вели дека има начин да се победи и таков тим.
„Морате да верувате во својот приод на мечот и да се обидете да им направите проблеми, бидејќи имаме начини да предизвикаме незапирлив тим. За мене ова е најкомплетниот Сити, бидејќи имаат алтернативи на секоја позиција, и тоа со врвни играчи. Може да те извадат од баланс на било кое место на теренот. Но, во едно финале, сите работи се можни бидејќи ситуацијата може да се смени за секунда. Ќе се навратам на 2010 во полуфиналето против Барселона, бидејќи тоа беше речиси како финале. Успеавме да надминеме незапирлив тим. Ако имаме верба во нашата игра, работите се можни. Премиерлигата е силна и ова ќе биде важно финале против голем тренер“, вели Занети.