Фудбалерот на Селта од Виго Санти Мина е осуден на затворска казна во време траење од четири години. Санти Мина заврши зад решетки поради сексуален напад. На нападната девојка тој ќе мора да и плати и оштета од 50.000 евра.
Нападот се случил на 18. јуни 2017 година, а по долго судење, судот во Алмерија го осуди 26-годишниот фудбалер на Селта на долгогодишна затворска казна.
Покрај овие казни, Мина доби забрана за приближување до својата жртва во радиус од 500 метри во период од 12 години.
Мина пред судот се бранеше со тврдењето дека добил согласност од девојката.
Фудбалерот се надеваше дека ќе добие казна затвор до две години, бидејќи според законот во Шпанија, осудените на две или помалку години затвор можат да платат отштета и воопшто да не одат зад решетки.
Заедно со Мина, за сексуален напад и обид за силување му се судеше и на фудбалерот на Ибица, Дејвид Голдар, но тој беше ослободен од обвиненијата.
Санти Мина е поранешен млад репрезентативец на Шпанија. Роден е во Виго, каде ја започна професионалната кариера. Во 2015 година за 10.000.000 евра се пресели во Валенсија. По четири солидни сезони на „Местаља“ се врати во својот матичен клуб.
Сезонава во Селта одигра 19 натпревари и постигна осум гола.