Поранешниот аргентински репрезентативец Езекиел Лавеци (38) во последните два месеци ги минува најтешките моменти во животот. Неодамна по неколку хоспитализации заврши на психијатрија. Беше избоден со нож во декември, а неколку недели по закрепнувањето се предозира.
„Марка“, пишува дека лекарите му дијагностицирале хипоманија, хронично нарушување на расположението.
„Тој не се лекува од злоупотреба на дрога или алкохол, туку од психијатриско пореметување кое може да предизвика некој да се само повреди и кое може да биде поттикнато од различни фактори“, изјави адвокатот на Лавеци, објаснувајќи дека хипоманична епизода може да трае од еден до четири дена.
Хипоманијата е дел од биполарното растројство, а позната е и како манична депресија.
Лавеци беше најплатениот фудбалер во светот. Над 20 милиони евра заработи во Хебеи, Кина.
Во својата кариера играше за Естудијантес, Сан Лоренцо, Наполи и ПСЖ, а за Аргентина забележа 51 настап и го освои сребрениот медал на Светското првенство во Бразил 2014 година.