Србите во редовите на ЛА Клиперс, Милош Теодосиќ и Бобан Марјановиќ, беа во центарот на вниманието, во поразот на нивниот тим од Торонто Репторс 99:123.
Марјановиќ бидејќи беше најефикасен кај ЛА Клиперс, а Теодосиќ со трите асистенции ги воодушеви Американците, покажувајќи дека се уште има магија во неговите раце, иако ретко добива шанса од тренерот Док Риверс.
„Милош Теодосиќ и неговата клиника на асистенции“, пишува на официјалниот „Твитер“ профил на НБА лигата.
Теодосиќ за 19 минути имал учинок од девет поени (3/5 тројки) и три асистенции, додека Марјановиќ за 16 минути успеал да забележи 18 поени и седум скока.
Репторс без својот најдобар играч Каваи Ленард, одиграа тимски, шестмина постигнаа двоцифрен број на поени. Репторс имаат најдобар скор во НБА лигата, 22 победи и седум порази.
До победата над ЛА Клиперс, Репторс ги предводеше Серж Ибака со 25 поени.
Во преостанатите два натпревари што се одиграа изминатата ноќ, Хјустон славеше над Портланд 111:103. Крис Пол го забележа 15. трипл-дабл во кариерата (11 поени, 11 скока, 10 асистенции), а најефикасен беше Џејмс Харден со 29 поени. На другата страна Демијан Лилард постигна 34 поени, а Јусуф Нуркиќ забележа 15 поени и 10 скока.
Сан Антонио Спарс лесно се справија со Феникс Санс (111:86). Брин Форбс со 24 поени и 11 скока (5/5 тројки) и Ламаркус Олдриџ со 18 поени го предводеа тимот на Грег Поповиќ до победата.